EXPOSICIÓN EN RIBEIRA

         

 

Exhiben obras de Toulouse-Lautrec ata o 22 en Ribeira    

Poden contemplarse no Museo do Gravado de Artes // Están expostas trinta e seis litografías

 

 

 

O Museo do Gravado de Artes (Ribeira) acolle dende o pasado día 13 ata o vindeiro 22 de xaneiro unha nova exposición, titulada Toulouse-Lautrec: Elles (1890)-Litografías (1893-1900), que amosa trinta e seis obras litográficas do artista francés Henri Marie Raymond de Toulouse-Lautrec-Montfa (1864-1901).

 

Comisariada por Daniel Buján e coordinada por Pastor Rodríguez, director do centro museístico ribeirense, a mostra foi inaugurada o venres nun acto que contou ademais coas intervencións de Javier Expósito, vicepresidente da Fundación Museo de Artes; da tenente de alcalde de Ribeira, María Sampedro; e da deputada provincial Sandra González.

 

Numerosas persoas quixeron estar presentes nesta apertura dunha exposición que integra dúas coleccións denominadas Elles, composta por once obras a cor coas que, en palabras de Daniel Buján, o artista "chega ao seu cénit" situándose á altura de xenios como Goya, e Litografías, con creacións que abranguen dende o ano 1893 a 1900.

 

Por outra banda, no mencionado museo estase a desenvolver esta fin de semana o primeiro curso sobre a técnica de estampación denominada V33, ideada polo catedrático da Universidade de Salamanca José Fuentes Esteve, encargado de impartilo xunto co artista Antonio Navarro.

 

Para conmemorar o 140 aniversario da publicación do poemario Aires da miña terra, o centro quere realizar unha exposición e editar en 2020 un volume ilustrado desta obra, primeiro libro dun dos grandes poetas do Rexurdimento, Manuel Curros Enríquez. E, con tal fin, os alumnos e alumnas participantes no obradoiro están a realizar as ilustracións coas que se editará un volume especial de dito poemario.

O taller chegará hoxe ao seu fin coa entrega de diplomas, ás 14.00 horas, que serán entregados polo presidente da Fundación Museo de Artes do Gravado e o alcalde de Ribeira, Manuel Ruiz Rivas. Aos resultados obtidos nesta primeira edición sumaranse os da segunda quenda, que terá lugar no vindeiro mes.

 

HASTA EL 22 DE ENERO